Hamro Khabar

नाइजेरियाली सेनाको कारबाहीमा २५० बन्दुकधारी मारिए

शुक्रबार, आश्वीन २९ २०७८

नाइजेरियामा सरकारी सेनाले केही समय यता गरेको कारबाहीमा करिब २५० जना हतियारधारी मारिएका छन् ।

त्यहाँको सेनाले बिहीबार दिएको जानकारी अनुसार सेप्टेम्बर महिनायता कम्तीमा पनि २५० जना बन्दुकधारीहरु सेनाको कारबाहीमा मारिएका हुन् । नाइजेरियाको उत्तरपूर्वी क्षेत्रमा ती हतियारधारीहरु मारिएको समाचारमा जनाइएको छ । अबुजामा बिहीबार भएको पत्रकार सम्मेलनमा यस्तो जानकारी दिइएकोे हो । सेनाले गरेको कारबाहीका क्रममा अरु ६०० जना भन्दा बढीलाई पक्राउ गरिएको छ । उनीहरुलाई नाइजेरियाका विभिन्न कारागारमा राखिएको छ ।

सैन्य प्रवक्ताले पत्रकार सम्मेलनमा दिएको जानकारीअनुसार यस कारबाहीलाई सेनाले एक सफल सैन्य कारबाही भनेको छ । नाइजेरियाको उत्तरपूर्वी विभिन्न स्थानमा अज्ञात हतियारधारीहरुले नागरिकको हत्या गर्ने गरेका छन् । सेनाले महिना दिन यता गरेको कारबाहीमा ती बन्दुकधारीहरुबाट ठूलो संख्यामा हतियार पनि बरामद गरिएको जनाएको छ ।