काठमाडौँ । काठमाडौं जिल्लाका न्यायाधीश राजकुमार कोइराला र नेपाल बार एसोसिएसनका पूर्व कोषाध्यक्ष रुद्र पोखरेलबीच व्यवसायी इच्छाराज तामाङलाई धरौटीमा छुटाउन भएको घुस लेनदेनबारेको अडियो सार्वजनिक भएपछि अहिले न्यायक्षेत्र तरंगित भएको छ ।

न्यूज २४ टेलिभिजनमा मंगलबार साँझ सार्वजनिक भएको अडियोमा थुनामा रहेका तामाङलाई १० करोडमा छुटाउँदा २ करोड आफूहरुलाई आउने भन्दै पोखरेलले कोइरालालाई भनेका छन् । अडियो अनुसार तत्कालिन प्रधानन्यायाधीश चोलेन्द्रशम्शेर जवरासमेत मुछिएका छन् । अडियाेमा  पोखरेलले प्रधानन्यायाधीशदेखि काठमाडौं जिल्ला अदालतका प्रमुखसम्मलाई आफूले मिलाउने कुरा बोलेका छन् ।
यो अडियो सार्वजानिक भएपछि सम्पूर्ण न्यायक्षेत्रकै आलोचना भइरहेको छ । यसैबीच कामु प्रधानन्यायाधीश दीपककुमार कार्कीले न्यायपरिषद्को आकस्मिक बैठक बोलाएका छन् । व्यवसायी इच्छाराज तामाङलाई धरौटीमा छुटाउन  काठमाडौं जिल्लाका न्यायाधीश राजकुमार कोइराला र नेपाल बार एसोसिएसनका पूर्व कोषाध्यक्ष रुद्र पोखरेलबीच भएको घुस लेनदेनबारेको अडियो सार्वजनिक भएपछि आकस्मिक रुपमा न्यायपरिषदको बैठक डाकिएको हो । निलम्बित प्रधानन्यायाधीश पनि जाेडिएकाले याे प्रकरण थप पेचिलाे बनेकाे छ ।

बैठक दिउँसो १ बजेका लागि तय भएको न्यायपरिषद्का एक सदस्यले बताए । यद्यपी बैठकको एजेन्डाबारे भने खुलाइएको छैन । तर भर्खरै अडियो सार्वजानिक भएकाले सोही सम्बन्धमा छलफल हुने ति सदस्यले बताए ।